AAMF’ன் அவசரக் கூட்டத்தில் அல் அமீன் ஜாமிஆ மஸ்ஜிதுக்குப் புதிய நிர்வாகக் கமிட்டி !

AAMF’ன் அவசரக் கூட்டத்தில்

அல் அமீன் ஜாமிஆ மஸ்ஜிதுக்குப் புதிய நிர்வாகக் கமிட்டி!

 

அஸ்ஸலாமு அலைக்கும் (வரஹ்).

அதிரை அனைத்து முஹல்லா கூட்டமைப்பு சார்பாக கடந்த ( 04-05-2012  )  அன்று கடற்கரைத்தெரு முஹல்லாவில் நடந்த ஐந்தாவது கூட்டத்தில், அல் அமீன் பள்ளி சம்பந்தமாக வருகின்ற 06/05/2012 அன்று அஸர் தொழுகைக்குப்பின் சம்சுல் இஸ்லாம் சங்கத்தில் அல் அமீன் ஜாமிஆ பள்ளியின் நிர்வாகிகளை வரவழைத்துப் பேசுவது என்ற தீர்மானத்தை எடுத்து, இன்று அஸர் தொழுகைக்குப் பின் அவசரக் கூட்டம் கூட்டப்பட்டது.

இக்கூட்டத்தின் தீர்மானத்தின்படி, அதிரை அனைத்து முஹல்லா கூட்டமைப்பு (AAMF ) சார்பாக, ஒவ்வொரு முஹல்லாவிலிருந்தும் தலா இருவர் வீதமும், ஹிமாயத்துல் இஸ்லாம் சங்கம் சார்பாக இரண்டு நபர்களும், நமதூரைச் சேர்ந்த சகோதரர்கள் மூவர் ஆகக் கூடுதல் இருபத்திமூன்று நபர்களைக் கொண்ட ‘அல் அமீன் ஜாமிஆ மஸ்ஜித் கமிட்டி’ என்ற பெயரில் உருவாக்கி, அல்லாஹ்வின் பள்ளியைக் கட்டி எழுப்புவது என்றும், அதன்படிக் கீழ்க்கண்ட புதிய நிர்வாகக் குழு ஒன்று அமைக்கப்பட்டுள்ளது:

தலைவர்             : மெளலவி முஹம்மது இப்ராகிம் ஆலிம்

துணைத் தலைவர்   : M.M.S. சேக் நசுருதீன்

துணைத் தலைவர்   : S.M.A. அக்பர் ஹாஜியார்,

செயலாளர்          : S.K.M.அஹமது அன்சாரி

துணைச் செயலாளர் : A. நெய்னா முஹம்மது ( மான் )

துணைச் செயலாளர் : S. அஹமது ஹாஜா

பொருளாளர்         : M.S. ஷிஹாபுதீன்

செயற்குழு உறுப்பினர்கள்:

M. நிஜாமுதீன்

P.M.K. தாஜுதீன்

M.I. முஹம்மது பாக்கர்

S. S. சேக்தாவுது

M.A. அஹமது ஹாஜா

J. சாகுல் ஹமீத்

K.M. பரக்கத் அலி

K. யாஹியா கான்

S.M.A. அஹமது கபீர்

S. அஹமது ஜலீல்

E. வாப்பு மரைக்காயர்

A. முஹம்மது மொய்தீன்

N.M. ஜபருல்லா

I. இஷாக்

மர்ஜூக்

S. அப்துல் ரெஜாக்

இந்தக் கமிட்டியின் அடுத்த கூட்டம் வருகின்ற19/05/2012 அன்று அஸர் தொழுகைக்குப் பின் நமதூர் தரகர் தெருவில் உள்ள முகைதீன் ஜும்ஆ பள்ளி வளாகத்தில் நடைபெறும் (இன்ஷா அல்லாஹ்).

அதிரை அனைத்து முஹல்லா கூட்டமைப்பின் (AAMF ) – ஐந்தாவதுக் கூட்டம் !

அதிரை அனைத்து முஹல்லா கூட்டமைப்பு (AAMF ) சார்பாக ஐந்தாவது கூட்டமாக இன்று ( 04-05-2012 ) அஸர் தொழுகைக்குப்பின் அதிரையின் பழமைவாய்ந்த மற்றும் பாரம்பரியமிக்க தெருக்களில் ஒன்றாகிய கடற்கரைத் தெருவில் உள்ள ஜும்மா பள்ளியில் நடைபெற்ற கூட்டத்திற்கு, சகோ. M.S. சிஹாபுதீன் ( AAMF ன் ஒருங்கினைப்பாளர் ) அவர்கள் தலைமையிலும், M.M.S. சேக் நசுருதீன் ( தலைவர் – AAMF ) மற்றும் பேராசிரியர் M.A. முகமது அப்துல் காதர் ( செயலாளர் – AAMF )அவர்கள் முன்னிலையிலும், சிறப்பு அழைப்பாளராக பேருராட்சி தலைவர் S.H அஸ்லாம், சகோ. அக்பர் ஹாஜியார், சகோ. ஜமீல் M. ஸாலிஹ், சகோ. C. முஹமது இப்ராகிம் ( பைத்துல்மால் இணைச்செயலாளர் ), சகோ. B. ஜமாலுதீன் ஆகியோர்களின் பங்களிப்புடன் இனிதே ஆரம்பமானது.
 

நிகழ்ச்சியின் நிரலாக.............


மெளலவி. முஹம்மது இப்ராகிம் ஆலிம் அவர்களால் கிராஅத் ஓதுப்பட்டது.

M.M.S. சேக் நசுருதீன் ( தலைவர் – AAMF ) அவர்களால் வரவேற்புரை நிகழ்த்தப்பட்டது.
 

அல் அமீன் பள்ளி நிலைப்பாடு சம்பந்தமாக வருகின்ற 06/05/2012 அன்று அஸர் தொழுகைக்குப்பின் நமதூர் சம்சுல் இஸ்லாம் சங்கத்தில் ஏற்பாடு செய்யப்படுகிற அவசரக்கூட்டதில் அல் அமீன் ஜாமிஆ பள்ளியின் நிர்வாகிகளை வரவழைத்து பேசுவது என்று தீர்மானம் செய்யப்பட்டது.

அதிரை அனைத்து முஹல்லா கூட்டமைப்பு (AAMF ) சார்பாக இதுவரைக் கூட்டப்பட்ட அனைத்துக் கூட்டத்திலும் எடுக்கப்பட்ட தீர்மானத்திற்கு என்ன முடிவுக் காணப்பட்டது ? என்ற சகோ. M.S. சிஹாபுதீன் அவர்களின் கேள்விக்கு விளக்கங்கள் தரப்பட்டது குறிப்பிடத்தக்கது.

 

அதிரை பேரூராட்சிக்கு மூன்று சக்கர வாகனம் வாங்குவதற்காக சம்சுல் இஸ்லாம் சங்கம் துபை கிளை சார்பாக நிதி உதவியாக ரூபாய்  25,000/- பேருராட்சி தலைவர் S.H அஸ்லாம் அவர்களிடம் வழங்கப்பட்டது.

நிகழ்ச்சியில் அதிரை அனைத்து முஹல்லா கூட்டமைப்பு (AAMF ) சார்பாக அதன் செயற்குழு உறுப்பினர்கள் மற்றும் “கடற்கரைத் தெரு முஹல்லா“ வின் முக்கியஸ்தர்கள் எனக் கலந்துகொண்டு சிறப்பித்தனர். இறுதியாக சிறப்பாக ஏற்பாடுகள் செய்யப்பட்ட “கடற்கரைத் தெரு முஹல்லா“ நிர்வாகத்தினற்கு வாழ்த்துகள் பரிமாறப்பட்டு துவாவுடன் இனிதே நிறைவு பெற்றது.

குறிப்பு :

அதிரை அனைத்து முஹல்லா கூட்டமைப்பு ( AAMF ) சார்பாக ஏற்கனவே எடுக்கப்பட்ட முடிவின்படி ஒவ்வொரு மாதமும் ஒன்பது முஹல்லாவிலும் தலா ஒரு கூட்டம் வீதம் எனவும், இதன்படி அடுத்த கூட்டமாக “ஹஜரத் பிலால் நகர் முஹல்லாவில்“ வருகின்ற 08-06-2012  அன்று நடைபெறும் ( இன்ஷா அல்லாஹ் ! ) இதற்கிடையில் அவசரத் தேவைகளைக் கருத்தில் கொண்டு கூட்டப்படுகிற கூட்டங்களும் நடைபெறும்.

சேக்கனா M. நிஜாம்

குடும்பக்”கொல்லி”யை ஊரைவிட்டு(த்) துரத்த....

தமிழகத்தில் முஸ்லிம்கள் பெருபான்மையாக வாழக்கூடிய, வரலாற்று சிறப்பு மிக்க பிரபல கல்வி நிறுவனங்கள், மார்க்கத்தை பயிற்றுவிக்கும் மதரசாக்கள், மனித நேயத்தை வளர்க்க மஸ்ஜித்கள், சமுதாய சேவைகளுக்கென்று இஸ்லாமிய அமைப்புகள், பைத்துல்மால், தன்னார்வ தொண்டு நிறுவனங்கள் மற்றும் பிரபல அரசியல் கட்சிகள் அமையப்பெற்ற ஊர்களில் அதிரைப்பட்டினமும் ஓன்று இவ்வூரில் பிரபல தொழில் அதிபர்கள், கல்வி சீமான்கள், கொடை வள்ளல்கள், மார்க்க அறிஞர்கள், கல்வி பயின்ற மேதைகள், கணினி வல்லுனர்கள், மருத்துவர்கள், பொறியாளர்கள், சட்டம் தெரிந்த வல்லுனர்கள், கவிஞர்கள், எழுத்தாளர்கள் வாழ்ந்த, வாழ்ந்துகொண்டுருக்கிற ஊரில்.........”மதுக்கடைகள்” !

இவை ஓன்று, இரண்டாகி, மூன்று, நான்காகி, ஐந்து என பெருகிக்கொண்டே வருவது மிகவும் வேதனையளிக்கக் கூடியது மட்டுமல்ல ஊரிலுள்ள குடும்பங்களையே அழிவின் பாதையில் அழைத்துச் சென்றுவிடும்.

இடம் : பட்டுக்கோட்டை ரோடு ( பாத்திமா நகர் அருகே )

“மதுக்கடை + கூடம்” ஜருராகத் தயாராகிறது நமதூருக்கே பெருமை சேர்க்கக்கூடிய மிகப்பெரிய மருத்துவமனை எனும் சிறப்பைப் பெறுகிற “ஷிஃபா” அருகே............

மேலும் விபத்துகள் அடிக்கடி ஏற்படுகிற சாலைப்பகுதி, அதிரை மின்சார வாரியம், இன்டேன் காஸ் நிறுவனம் போன்றவை அமைந்துள்ளப் பரபரப்பானப் பகுதியின் அருகே...........

இடம் : E.C.R சாலை ( பெரிய ஏரி அருகில் )

ஒரு நிமிடத்திற்கு ஏறக்குறைய 60 வாகனங்கள் கடந்து செல்லக்கூடிய இரு வழிச்சாலைப்பகுதி E.C.R. இச்சாலையில் நமதூரைச் சேர்ந்த சகோதர சகோதரிகள் சிலர் அதிகாலைப்பொழுதிலும் வேறுசிலரோ மாலை நேரங்களிலும் “வாக்கிங்” “சைக்கிளிங்”,”ஜாக்கிங்” போன்றவற்றை செய்வதுண்டு.

மேலும் இப்பகுதியில் அதிகமாக விபத்துக்கள் ஏற்படுவதைக் கருத்தில் கொண்டு நமது அரசு மருத்துவமனையின் இரவு நேர சேவை மற்றும் கூடுதல் டாக்டர்கள் நியமிக்க வேண்டி நமதூரைச் சார்ந்த சமூக ஆர்வலர்கள் மற்றும் ஒரு சில அரசியல் கட்சிகளின் கோரிக்கையாக அரசின் கவனத்துக்கு கொண்டுசெல்லும் இவ்வேளையில் அப்பகுதியில் குடும்பத்தையே அழித்துவிடக்கூடிய “மதுக்கடை”



சமீபத்தில்தான் மதுவின் பாதிப்புகள் மற்றும் தீர்வுகளைப் பற்றி “குடிக்காதே”எனும் தலைப்பிட்டு விழிப்புணர்வைத் தூண்டும் விதமாகக் கட்டுரை ஓன்றைப் பதிந்த எனக்கே இக்கூடங்களைக் கண்டதும் மிகவும் மன வேதனையடையச் செய்ததே...............!

அப்போ உங்களுக்கு எப்படி இருக்கும் ?

நமதூர் பிரபல அரசியல் கட்சிகளே !

சமுதாய அமைப்புகளே !!

இயக்கவாதிகளே !!!

தொண்டு நிறுவனங்களே !!!!

சமூக ஆர்வலர்களே !!!!!

மாணவ, மாணவிகளே !!!!!!

பொதுமக்களே !!!!!!!

எழுந்துருங்கள் ! தயாராகுங்கள் !! புறப்படுங்கள் !!! இதுபோன்ற குடும்பக்கொல்லியை ஊரைவிட்டு துரத்துவதற்கென்றே.................

சேக்கனா M. நிஜாம்

இறைவன் நாடினால் ! தொடரும்......................

அதிரை பேரூராட்சியின் அவசரக்கூட்டம் !

அதிரை பேரூராட்சிக்கு உட்பட்ட பகுதிகளில் அதன் நிர்வாகத்தினால் பிளாஸ்டிக் பை ஒழிப்பு மற்றும் விழிப்புணர்வு நடவடிக்கைகள் மேற்கொண்டு வருவது நாம் அறிந்ததே. இதன் தொடர்ச்சியாக நேற்று அதிரை பேரூராட்சி அலுவலர் மற்றும் ஊழியர்களால் ஒரு சில இடங்களுக்குச் சென்று பிளாஸ்டிக் பை புழக்கத்தில் உள்ளனவா என கண்காணிக்கும்போது ஏற்பட்ட அசம்பாவிதங்களை அடுத்து இன்று மாலை பேரூராட்சியின் சார்பாக அவசரக்கூட்டத்திற்கு ஏற்பாடுச் செய்யப்பட்டது. 

இக்கூட்டத்தில் பிளாஸ்டிக் பை ஒழிப்பு முழுவதும் நிறைவேற்றும் வண்ணமாக நாளை மாலை அதிரையிலுள்ள அனைத்து வர்த்தக நிறுவனங்கள், கடைகள், ஹோட்டல்களுக்குச் சென்று “மீண்டும் நினைவூட்டல் அறிவிப்புகளை” நோட்டிஸ் மூலம் அனைவருக்கும் தெரியப்படுத்துவது என்றும் மேலும் பிளாஸ்டிக் பை தடைகளை மீறி பயன்படுத்துவோர் மீது கடும் நடவடிக்கைகள் எடுப்பது என்று ஆலோசிக்கப்பட்டது.

மேலும் இக்கூட்டத்தில் பேரூராட்சி தலைவர், துணைத்தலைவர் மற்றும் வார்டு உறுப்பினர்கள் கலந்துகொண்டு தங்களின் கருத்துக்களைத் தெரிவித்தனர். 

அதிரை “WCC” நடத்திய மாபெரும் கிரிக்கெட் தொடர் போட்டியின் பரிசளிப்பு விழா நிகழ்ச்சிகள் !

அதிரை “வெஸ்டர்ன் கிரிக்கெட் க்ளப்”  ( WCC ) சார்பாக நடத்தப்பட்ட மாபெரும் கிரிக்கெட் தொடர் போட்டியின் இறுதி நாளான நேற்று  ( 22-03-2012 ) வெற்றி பெற்ற போட்டியாளர்களுக்கு பரிசளிப்புகள் நடைபெற்றது.

இத்தொடர் போட்டியில் அதிரையைச் சார்ந்த WCC , AFCC, KCC, SYDNEY, RCCC,  ABCC,  ASC, போன்ற உள்ளூர் அணிகளும், மேலும்  XXX மிலாரிக்காடு, வேதாரண்யம், நெய்வேலி, தஞ்சாவூர், பட்டுக்கோட்டை, மதுக்கூர், பாப்பாநாடு, புதுப்பட்டினம், கறம்பக்குடி, முல்லாங்குறிச்சி, தம்பிக்கோட்டை, மறவக்காடு, மன்னாங்காடு, வடகாடு, எட்டாம்புலிகாடு போன்ற வெளியூர் அணிகளும் பங்கு பெற்று சிறப்பாக தங்களின் திறமைகளை வெளிப்படுத்தினார்கள்.

போட்டியில் வெற்றிப்பெற்ற அணிகளின் விவரங்கள் :

1.       முதல் பரிசு : பாப்பாநாடு அணியினர்

2.       இரண்டாம் பரிசு : அதிரை  WCC அணியினர்

3.       மூன்றாம் பரிசு : அதிரை AFFC அணியினர்

4.       நான்காம் பரிசு : மதுக்கூர் அணியினர்

மேலும் போட்டிகளில் விளையாடி தங்களின் தனித்திறமைகளை வெளிபடுத்திய விளையாட்டு வீரர்களுக்கும் சிறப்பு பரிசுகள் வழங்கி கௌரவிக்கப்பட்டது.

விழா நிகழ்ச்சிகளை அதிரை  WCC அணியின் நிர்வாகத்தினர் சிறப்பான ஏற்பாடுகளை செய்துருந்தனர்.

பிளஸ் 2 மாணவர்கள் அதிக மதிப்பெண்கள் பெற.......( இன்ஷா அல்லாஹ் ! )

உயர் கல்விக்கும், எதிர்கால வாழ்வுக்கும் அடிப்படையாக இருப்பதால் பிளஸ்-2 தேர்வில் கிடைக்கும் ஒவ்வொரு மதிப்பெண்ணும் விலைமதிக்க முடியாதது.

எனவே மார்ச் 8-ம் தேதி தொடங்கும் பிளஸ்-2 பொதுத் தேர்வில் அதிக மதிப்பெண்கள் பெற பாடத்தைப் புரிந்து படிப்பதும், திட்டமிட்டு தேர்வுக்கு தயார்படுத்திக் கொள்வதும் அவசியமாகிறது. முக்கிய பாடங்களில் அதிக மதிப்பெண்கள் பெறும் வழிமுறைகள் குறித்து சிறப்பாசிரியர்கள் கூறும் அறிவுரைகள்:

இயற்பியல்:

இயற்பியலில் 1, 2, 4, 6, 7, 8, 9 ஆகிய பாடங்களில் இருந்தே 90 சதவீத மதிப்பெண்களுக்கான கேள்விகள் இடம்பெறும். 10 பாடங்களில் 6 பாடங்களைப் படித்தாலே 147 மதிப்பெண்களைப் பெற முடியும். 1, 4, 6, 8 ஆகிய 4 பாடங்களில் மட்டும் 100 மதிப்பெண்களுக்கு வினாக்கள் கேட்கப்படும்.

இரண்டுக்கும் இடையிலான வேறுபாடுகள், பண்புகள் குறித்த கேள்விகளைப் படிக்கும் போதும், பதிலளிக்கும்போதும் அட்டவணை வடிவில் அமைத்துக் கொள்ள வேண்டும்.

10 மதிப்பெண் வினாக்களைப் பொறுத்தவரை முதல் இரண்டை நிதானமாகவும், அடுத்த இரண்டு விடைகளை வேகமாகவும் எழுத வேண்டும். இல்லாவிட்டால், 5, 3 மதிப்பெண் வினாக்களுக்கு நேரம் கிடைக்காது.

இயற்பியலில் சூத்திரங்கள் எழுதினால் ஒரு மதிப்பெண்ணும், 10 மதிப்பெண் வினாவுக்கான மையக் கருத்தை எழுதினால் 2 மதிப்பெண்களும் கிடைக்கும். எனவே, இவற்றை மனதில் வைத்துப் படிக்க வேண்டும் என்கிறார் சென்னை ஆழ்வார்ப்பேட்டை அரசு மேல்நிலைப் பள்ளி முதுநிலை (இயற்பியல்) ஆசிரியர் ஏ.சங்கர்.

உயிரியல்:

உயிரியலில் படம் வரையக் கூடிய வகை வினாக்களைத் தேர்வு செய்தால் அதிக மதிப்பெண்கள் கிடைக்கும். படங்களுக்கும் அதற்கான விளக்கத்துக்கும் தனித்தனியே மதிப்பெண் உண்டு.

படம் எளிமையாக இருந்தாலும் விளக்கத்தை மட்டும் தெளிவாக எழுதினால் போதும். வினாக்களுக்கான முக்கிய விளக்கத்தை மட்டும் எழுதினால் போதும்.

விடைகள் தெளிவாகவும், ஒன்று, இரண்டு என்று குறிப்பிட்டு விளக்கங்களைப் பிரித்து எழுதுவதும் அதிக மதிப்பெண்களைப் பெற்றுக் கொடுக்கும்.

தாவர உள்ளமைப்பியல், தாவர செயலியல் பாடங்களில் அதிக மதிப்பெண்கள் கிடைக்கும் என்கிறார் காஞ்சிபுரம் மாவட்டம், செம்பாக்கம் அரசு மேல்நிலைப் பள்ளி முதுநிலை (உயிரியல்) ஆசிரியர் ஏ.காசி.

கணிதம்:

கணிதப் பாடத்தைப் பொறுத்தவரை முதலில் ஒரு மதிப்பெண் வினாக்களுக்கு விடையளிக்க வேண்டும். பின்னர் 10 மதிப்பெண் வினாக்களில் தெரிந்தவற்றை முதலில் எழுத வேண்டும். பிறகு 6 மதிப்பெண் வினாக்களில் தெரிந்தவற்றுக்கு முதலில் விடையளிக்க வேண்டும். அதன் பிறகே விடுபட்டவற்றுக்கு விடையளிக்க வேண்டும்.

அணிகளும் அணிக்கோவைகளும் பாடத்தில் கேட்கப்படும் 10 மதிப்பெண் வினாவுக்கு முடிந்தவரை கடைசியில் விடையளிப்பதே நல்லது.

ஏனெனில் அதில் பிளஸ், மைனஸ் குறியீடுகள் அதிகம் இடம்பெறும். அதில் ஏதேனும் சிறிய தவறு செய்தால் விடை தவறாகும்.

கணித சூத்திரங்களை மாறுபட்ட கலரிலோ, பெட்டிகள் போட்டோ தனியாகக் காட்டலாம். ஏனெனில் கணிதத்தில் ஸ்டேஜ் மதிப்பெண்கள் எனப்படும் ஒவ்வொரு வரிகளுக்குமான மதிப்பெண் முறை உள்ளது.

3 மணி நேரத் தேர்வை 2.45 மணி நேரத்திலேயே முடித்துவிட்டு எழுதியவற்றை சரிபார்த்துக் கொண்டால் முழு மதிப்பெண்களையும் பெற முடியும் என்கிறார் சேலம் குகை மேல்நிலைப் பள்ளி முதுநிலை (கணிதம்) ஆசிரியர் எம்.பனிமேதாஸ்.

வேதியியல்:

ஒரு மதிப்பெண் வினாக்களுக்கு விடையளிக்கும்போது சரியான விடை அல்லது அதற்கான எண்ணை எழுதினாலே போதும்.

3 மதிப்பெண் வினாக்களுக்கு பாரா வடிவில் பதில் எழுதாமல் ஒன்று, இரண்டு என்று பாயிண்டுகளாக பிரித்துக் கொடுத்தாலே போதும்.

"பீனால்" தயாரிக்கப்படும் முறை பற்றிய வினாவுக்கு அதற்கான சமன்பாடுகளை எழுதி அதற்கும் கீழே அவற்றுக்கான வேதியியல் பெயரை மட்டும் எழுதினாலே போதும்.

உரிய சமன்பாடுகளை எழுதி அதற்கான விளக்கத்தை எழுதினாலே போதுமானது. 10 மதிப்பெண் வினாவில் கேள்வி எண் 70-க்கு கட்டாயம் விடையளிக்க வேண்டும். அந்த கேள்விக்கு விடையளிக்க அனைத்தையும் படித்திருந்தால் மட்டுமே முடியும். வேதியியலைப் பொறுத்தவரை படங்களுக்கு அதிக முக்கியத்துவம் தேவையில்லை.

உதாரணமாக குரோமியம் பிரித்தெடுத்தல் என்பது போன்ற கேள்விகளுக்கு படங்களை பேனாவிலேயே வரைந்து கொள்ளலாம். பாகங்களையும் தனியாக எழுதாமல் அம்புக் குறியிட்டு அங்கேயே எழுதலாம். பக்கத்தை அழகுபடுத்துவதற்கு வேதியியலில் மதிப்பெண் இல்லை. கடந்த 3 ஆண்டுகளுக்கு முன்பு ஒரு கிராமப்புற மாணவரின் விடைத்தாள் சாதாரண கையெழுத்துடன், சமன்பாடு வரும் இடத்தில் பேனா, பென்சில், ஸ்கெட்ச் கொண்டு குறியீடு இடப்படாமலும் இருந்தது.

ஆனால், அந்த விடைத்தாளுக்கு 150-க்கு 150 மதிப்பெண் கிடைத்தது என்கிறார் நுங்கம்பாக்கம் அரசு ஆண்கள் மேல்நிலைப் பள்ளி முதுநிலை (வேதியியல்) ஆசிரியர் ஜி.கனகராஜ்.

தவறான கேள்விகளுக்கு முழு மதிப்பெண் கிடைக்குமா ?

எழுத்துப் பிழையாலும், அச்சுப் பிழையாலும் பொதுத் தேர்வு வினாத் தாள்களில் அர்த்தம் இல்லாத அல்லது தவறான கேள்விகள் இடம் பெறுவதற்கான வாய்ப்புகள் உள்ளன.

அவ்வாறு இடம்பெறும் கேள்விகளுக்கு அது தொடர்பான ஏதேனும் பதில் எழுதியவர்களுக்கு மட்டுமே அந்த கேள்விக்கான முழு மதிப்பெண் வழங்கப்படும்.

வெறுமனே கேள்வி எண்ணை மட்டும் எழுதிவிட்டு, பதிலுக்கான இடத்தை காலியாக வைத்திருப்பவர்களுக்கு மதிப்பெண்கள் வழங்கப்பட மாட்டாது என்று தேர்வுத் துறை உயர் அதிகாரி ஒருவர் தெரிவித்தார்.

கேள்வி தவறானதாகத் தோன்றும்பட்சத்தில் அந்தப் பாடம் தொடர்பான பதிலையோ, கேள்விக்கான பதில் இதுவாகத் தான் இருக்கக் கூடும் என்று தோன்றும் பதிலையோ எழுதிவிட்டு வருவதே நல்லது என்றார் அவர்.

Source : Day Magazine